ग्रामपंचायत कार्यालय बदद्ल माहिती

ग्रामपंचायत माहिती

बिजोरसे हे नाशिक जिल्ह्यातील बागलाण तालुक्यात वसलेले एक प्रगत आणि कृषिप्रधान गाव असून गावाची एकूण लोकसंख्या १९४० आहे, त्यामध्ये ९१८ स्त्रिया व ९८२ पुरुषांचा समावेश होतो. गावाचे एकूण क्षेत्रफळ ५७१ हेक्टर असून त्यापैकी गावठाण ३.७२ हेक्टर, तर उर्वरित क्षेत्र शेतीयोग्य जमिनीवर पसरलेले आहे. शेतीमध्ये कोरडवाहू, बागायती आणि पडीत जमीन असून मुख्य पिकांमध्ये बाजरी, गहू, मका, सोयाबीन, कांदा, टोमॅटो व विविध भाजीपाला यांचा समावेश होतो. सिंचनासाठी गावात २६० विहिरी, १५० बोअरवेल, १५ शेततळे, ४ बंधारे, २ तलाव तसेच एक नदी उपलब्ध आहे. गावात पिण्याच्या पाण्यासाठी नळ पाणी पुरवठा योजना कार्यरत असून विहिरींची देखील मदत घेतली जाते. सांडपाणी व्यवस्थेसाठी गटारी व शोषखडे उपलब्ध आहेत. गावात ग्रामपंचायत कार्यालय, तलाठी चावडी, उपकेंद्र आणि एक खाजगी दवाखाना अशा आवश्यक सरकारी व आरोग्य सुविधा आहेत. शैक्षणिक सुविधांमध्ये एक अंगणवाडी, जिल्हा परिषद प्राथमिक शाळा, तसेच मराठा विद्या प्रसारक संस्थेचे माध्यमिक विद्यालय यांचा समावेश आहे. गावात एकूण २१० पक्की व २०० कच्ची घरे आहेत. गावातील प्रमुख धार्मिक स्थळांमध्ये हनुमान मंदिर, भवानी माता मंदिर, प्रभू श्रीराम मंदिर आणि बुद्ध विहार यांचा समावेश होतो. तसेच विविध कार्यकारी सेवा सहकारी सोसायटी गावात कार्यरत आहे.